Informasjon

Soknerådet syter for at grava vert planert om lag 6 månader etter lukking av grav. Ein kan då montere gravminne på grava. Regelen om 6 månaders venting er vedteke fordi det vil ta tid før dei pågravde jordmassane sett seg skikkelig, og ein unngår at gravminnet sig skeivt. Gravminne kan tingast hjå Hyllestad kyrkjekontor, frå gravminneleverandør og frå dei fleste gravferdsbyrå. Firmaet som leverer gravminnet søkjer kyrkjeleg fellesråd om godkjenning før gravminnet kan monterast.

 

Mange ønskjer å verte gravlagt ved sida av ektefelle, sambuar eller annan i nær familie. I samband med dødsfall kan ein feste graver saman i éitt feste. Hovudregelen er då at ein har éitt gravminne på gravstaden som vert sentrert mellom gravene, når tinga grav vert teken i bruk.

 

Om ein skal ha ny inskripsjon på eksisterande gravminne kan ein kontakte kyrkjekontoret. Kyrkjekontoret formidlar kontakt med skrifthoggar som er innom 2 gonger i året (vår og haust) 

 

Det er graveigaren (festar eller den som er utpeikt som ansvarleg for fri grav) som har ansvar for at gravminnet ikkje er i forfall, eller er til fare/sjenanse. Det er derfor viktig at graveigaren fører tilsyn med gravminnet. Særleg gjeld dette etter kalde vintrar, då svært mange gravminne sig skeivt på grunn av forkastingar i jordmassane som følgje av kulde. Gravminne som veltar kan gje svært alvorlege skadar om nokon vert trefte. Soknerådet kan gje pålegg om utbetring av avvik dersom ein finn dette nødvendig. Dei som treng hjelp til sikring av gravminne kan kontakte kyrkjekontoret.

 

Graveigar har ansvar for stell av plantefeltet. Ein vil oppmode graveigar til jamnleg stell, og slik bidra til at gravfelta skal kunne framstå som velhaldne, t.d. gjeld det at plantar ikkje skal skjule gravminnet eller plantast utanfor plantefeltet). 

 

Det er mange som ikkje har høve til å stelle plantefelta på gravene dei har ansvar for. Om du treng hjelp til slikt stell, har vi ei ordning med gravstell på kyrkjegardane i Hyllestad.  Ein kan avtale stell for ein periode på 5 eller 10 år. Viss du er interessert i å inngå avtale om gravstell, kan du ta kontakt med kyrkjekontoret

 

 

I samband med stell av grav er det viktig at ein nyttar kjeldesortering av avfall. Kransar, gravlykter, potter, posar etc. skal i restavfall og naturavfall skal i komposten. Bossdunkar for restavfall er sett ut på kyrkjegardane.